Landfrauenreise Kerzenfabrik Herzog Sursee

Am 21. Oktober 2015 hän mir üs am zwölfi bir Landi Signau und am zwölfi zäh bim Chrütz z’Schüpach  troffe. Los gange isch es mit em Reist-Car Richtig Sursee. D’Fahrt isch via Wolhuse, am wunderschöne Soppeseeli, über Buttisholz nach Sursee gange. Dr Schofför het üs mängs über d’Region chönne verzelle, so dass die Fahrt sehr churzwiilig und interessant gsi isch.

Ir Cherzefabrik Herzog simmer härzlech empfange worde und hend dr ganz Betrieb sälbschtändig besichtige dörfe. D’Mitarbeiter und Mitarbeiterinne hend geduldig üser verschiedenschte und sicher o geng öppe die gliichige Froge beantwortet. S’Lädeli het es riesigs Aagebot gha und mängs Härz het höcher gschlage u d’Öigli si am Funkle gsi. Mit Seckli und Säck isch es am viertu ab drü wiiter zum wohlverdiente Z‘4-i gange. Es gmüetlechs Jägerstübli im Reschaurant Rössli z’Mauensee het üs mit feiner Spiis und Trank versorget. Es isch e huufe verzellt und glache worde. Am 16.30 Uhr händ mir de d’Gmüetlechkeit zrügg in Bus verleit und üs uf d’Heireis gmacht. D’Fahrt über Ettiswil, Zell, Huttwil und Sumiswald isch no verschöneret  worde, wo mr alli zämme, es ganz liebevoll verpackts, chlises Präsentli becho hend. Es grosses Dankschön an d’Andrea, d Margrith und d‘Elsbeth.

Pünktlech uf die Sächsi simmer zrugg gsi in Schüpbach und zäh Minute später in Signau.  

 

Übrigens söll mr jo no mol öpper säge, dass me geng uf d’Fraue warte muess. Mir si 43 Fraue gsi und es Paradebiischpil für Pünklechkeit. Es grosses Merci an alli.