Mir hei dörfe drei wunderschöni Aläss dürefüehrä... D Flyertour dür Signou, dr Abespaziergang uf dr Höchi u d Dekoration vor Chiuche füre Ärntedank-Gottesdienst. 

Gärn lö mir öich mit Biuder a denä Aläss chli la teilha... 

 

 

Wes di o mau gluschtet anä Alass ds cho - de chum gwüss.. Du bisch härzlech Wiukomme! 

 

Danke a aui wo a denä Aläss si derbi gsi...


Neue Präsidentin

Aues isch ä chli spezieu - zu Zyte vo Corona. Drum hei mir üsi Houptversammlig uf schriftlichem Wäg dürägfüehrt. 

D Christine Hofer isch aus nöii Präsidentin eistimmig (ei Enthautig) gwäuht worde. Mir gratuliere ihre ganz härzlech! 

D Resultat vor Houptversammlig überchömmet dir nächschtens per Post zuegschickt. 


Für e Umgang mit dä räschtliche plante Aläss vo däm Jahr hi mir üs entschiede, äs Infotelefon izrichte. Bir Christine Hirschi chüt dir öich unger dr Telefonnummer 034 497 18 78 jewils ab 10 Tag vorem Alass drüber informiere, ob u i weler Form mir dä tüe dürefüehre. Säubverständlich tüe mir o da uf dr Homepage loufend informiere. Bi Frage si mir jederzyt für öich erreichbar. Merci für öies Verständnis u öii Flexibilität.


 

Liebi Landfroue

  

Was da o grad aues luft oder äbe nümme luft uf üser Chugle, i üser wohl behüetete Schwiz! Mir hi üs gfragt, wies öich aune äch so giht i dere bsungere Zyt, wo für viu Mönsche grossi Herusforderige mit sich bringt?

 

Üses Vereinsläbe stiht stiu, wie so vieles im Momänt.

   

Da wird üs u öich villicht o bewusst, was das «zäme Zyt verbringe» würklich bedütet. Wie wichtig die soziale Kontäkt vo Chlin bis Gross, vo Jung bis Aut äbe igentlich si. Mir mine z wüsse, was mir hige a üsem Läbe, im normale Autag. Merke tüe mir`s aber doch de ersch, we mir vor Natur oder vom Gsetzt i üsne Müglechkite igschränkt wärde.

 

Aui Aläss u Kürs vo dä Landfroue hi mir wie dir längschtens hit verno, bis Ändi Mai abgsiit.                           Was mir wenn tüe nachehole, erfahret dir de, we sich aues beruehiget het.

 

D Zyt zwüschinne möchte mir nütze, mit öich ufeme Wäg Kontakt ufznäh, wo mit guetem Gwüsse müglich isch. Dr Wäg vor Briefposcht. Mir möchte öich aune e bsungrige Vereinsgruess schicke.

 

E Gruess mit viune guete Gedanke für aui die, wo im Momänt…

 

  • viu Zyt dahime müesse verbringe

  • ihrem bruefliche Autag nid chü nachegah

  • viu Zyt allini müesse erläbe

  • z viu Zyt hi für dä Gedanke, Sorge u Ängscht Platz z la

  • Hushaut, Schaffe, Ching ungerrichte u z Familieläbe unger i Huet müesse bringe

  • aui die wo zur Risikogruppe ghöre u drum bsungers abgschottet si vor Gseuschaft

 

…ja, eifach e bsungrige Gruess a aui Landfroue vo Signou u Schüpbach, ihri Familie u Aghörige.

  

Genau das wünsche mir öich aune!

  

Mir wünsche öich Zueversicht u Hoffnig, dass dir dr Sturm wo da usse tobet, gsung chüt überstah.

 

Das mir üs de hoffentlich glii wieder chü gseh 😊.

  

U mir wünsche öich Mönsche, wo öich trotz dr Distanz irgendwie chü zur Site stah. Mir aus Verein möchte öich o Ungerstützig abiete:

  

«Gits öpper unger öich wo dankbar isch für Ichöif z erledige, wo mir diräkt vor d Hustüüre liefere, Taxifahrte für zum Dokter, i d Apothek, oder eifach es Telefon würdi schätze für chli z brichte?»

  

Wenn ja, de mäudet öich doch bir Bettina Aeschlimann 079 235 60 03 oder Christine Hofer 079 866 40 72. Zäme mit em Vorstandsteam tüe mir öich gärn die nötegi Ungerstützig via Landfroueverein vermittle.

  

Säubverständlich gratis u vo Härze gärn gscheh!

Mir si für öich da! Bliebet gsung u bis glii. Härzlechi Grüess     


Juniorkarte SBB

Die Juniorkarte der SBB wird an unsere Vereinsmitglieder gratis abgegeben. Es gelten folgende Punkte zu befolgen: 

  • Die Juniorkarte wird für Kinder/Enkelkinder von Mitgliedern abgegeben
  • Pro Mitglied können maximal zwei Karten bezogen werden
  • Der Betrag von Fr. 30.00/Stück wird auf Vorweisung der gekauften Juniorkarte bei der Abgabestelle bar ausbezahlt.  
  • Die Auszahlung erfolgt nach telefonischer Vereinbarung mit der Abgabestelle

Abgabestelle der Juniorkarte:

Silvia Gehret

Sängeliweg 9

3534 Signau

034 497 18 70

079 257 77 23

 

Wo überall die Juniorkarte gültig ist, erfahrt ihr über die Internet-Übersichtskarte. 

Download
uebersichtskarte-halbtax-abo.pdf
Adobe Acrobat Dokument 1.3 MB